Ho skal løfte framtidas Bingsa
Nina Reinseth er ansatt i Attvin for å utvikle nye samarbeid og sirkulære løysningar i Bingsa.
Attvin står framfor ei spennande utvikling der nye krav, endra rammevilkår og auka merksemd rundt ressursutnytting gir både utfordringar og moglegheiter.
Med den nye stillinga ønskjer selskapet å styrkje arbeidet med å identifisere og utvikle nye forretningsmoglegheiter, tenester og samarbeid.
Annonse
– Vi er svært glade for å få Nina med på laget. Med kompetansen hennar innan marknad og produktutvikling, kombinert med gode relasjonsbyggjande eigenskapar, er vi sikre på at ho blir eit verdifullt tilskot til selskapet, seier dagleg leiar i Attvin, Øystein Solevåg.
Skal bidra til å utvikle Sirkulære Bingsa
Ei av dei sentrale oppgåvene til Reinseth blir å arbeide med Sirkulære Bingsa, eit prosjekt under Skaperkraft-satsinga.
Ambisjonen er å vidareutvikle Bingsa-området til eit knutepunkt for sirkulær næringsutvikling, der ressursar, kompetanse og aktørar kan koplast saman for å skape nye verdiar.
Annonse
Prosjektet skal leggje til rette for samarbeid mellom næringsliv og andre relevante aktørar, og utforske moglegheitene for nye verdikjeder, betre ressursutnytting og framtidsretta næringsaktivitet.
– Vi ser eit stort potensial i å utvikle Bingsa-området vidare. Skal vi lykkast med den sirkulære omstillinga, må vi tenkje nytt om korleis ressursane blir utnytta, og korleis vi kan skape verdiar gjennom samarbeid. Her vil Nina få ei viktig rolle, seier Solevåg.
Gler seg til å bidra
Reinseth ser fram til å ta fatt på oppgåvene og bidra til å utvikle både selskapet og nye samarbeidsmoglegheiter.
– Eg er veldig glad for å få bli ein del av Attvin, eit selskap som tek eit viktig samfunnsansvar og ser moglegheitene i ressursane vi har rundt oss. Å få bidra til å utvikle nye samarbeid og sirkulære løysingar som skaper verdi for både næringslivet og samfunnet, opplever eg som både meiningsfullt og motiverande. Eg gler meg til å vere med på å utvikle framtidas Attvin, saman med dyktige kollegaer og samarbeidspartnarar, seier ho.
Reinseth starta i den nye rolla i september.
